REVISTA SHKENCORE KULTURORE “UNIVERS”
 

Revista shkencore kulturore “UNIVERS” është një nga botimet më të reja për publikun shqiptar. Ajo botohet nga Departamenti i Studimeve dhe Kërkimeve të Institutit Shqiptar të Mendimit dhe  Qytetërimit Islam.

Qëllimi i saj është të bëjë të njohur trashëgiminë shkencore dhe kulturore, që kanë lënë pas dijetarët dhe shkencëtarët muslimanë dhe jomuslimanë, shqiptarë e të huaj, trashëgimi kjo e lënë pas dore, deri më sot dhe që vazhdon të ruhet nëpër arkivat e bibliotekave shtetërore e private.

Revista hedh dritë, nëpërmjet studimeve dhe artikujve shkencorë që përmban, mbi shumë pikëpyetje, të cilat nuk janë sqaruar plotësisht, si prejardhja e popullit dhe gjuhës  tonë e mjaft të tjera. Ajo përpiqet të nxjerrë në pah të vërtetën shkencore, pa asnjë lloj mbulese dhe pa asnjë lloj ndikimi të brendshëm apo të jashtëm. Ajo që të bie në sy në shkrimet e saj është liria e autorit për të shprehur idetë dhe mendimet e veta, pa u ndikuar aspak nga opinioni i redaksisë, duke i bërë të pavaruara dhe të respektueshme liritë krijuese dhe të drejtat e autorit.

Ky vlerësim serioz ka bërë që në revistën “Univers” të afrohen dhe të bashkëpunojnë firma mjaft të njohura në fushën e studimeve akademike në Shqipëri. Kjo falë edhe kontributit të vazhdueshëm dhe profesional të stafit drejtues dhe redaksisë së kësaj reviste. Ndër bashkëpunëtorët e revistës spikasin emrat e Akademik Shaban Demirajt, Prof. Dr. Shefik Osmani, Prof. Dr. Muzafer Xhaxhiut, Prof. Dr. Jup Kastrati, Prof. Dr. Hysni Myzyri, e shumë personaliteteve të tjera të shkencës dhe kulturës shqiptare dhe asaj botërore, që me shkrimet e tyre me nivel të lartë shkencor japin një kontribut të shquar në ndriçimin e kulturës, gjuhës, historisë dhe në përgjithësi shkencës së kombit shqiptar.

Revista do të dalë një herë në çdo gjashtë muaj dhe shoqërohet me një përmbledhje të përmbajtjes së saj në anglisht.